काठमाडौं । सुदूरपश्चिम प्रदेशका उद्योग, पर्यटन, वन तथा वातावरण मन्त्री रामेश्वर चौधरीलाई पदबाट राजीनामा दिन मुख्यमन्त्री कमलबहादुर शाहले निर्देशन दिएका छन्। बजेट निर्माणमा असहमति र अनुदानमा पावर टिलर वितरण प्रकरणका कारण मुख्यमन्त्री असन्तुष्ट बनेका हुन्।
नागरिक उन्मुक्ति पार्टी (नाउपा)बाट जेठ ४ गते मन्त्री नियुक्त भएका चौधरी हाल पार्टीभित्र आन्तरिक परामर्शमा छन्। चौधरीले बजेट निर्माणको क्रममा एकलौटी निर्णय गरेको अनुभव मुख्यमन्त्रीले गरेको स्रोतको दाबी छ। पूर्व कृषि मन्त्री रहेका चौधरी पावर टिलर अनुदानको नाममा किसानबाट पैसा असुल्ने समूहसँग जोडिएको भन्दै विवादमा मुछिएका थिए। यस प्रकरणमा कैलालीकी सुशिला खड्कासहित केही व्यक्तिहरू प्रहरी नियन्त्रणमा छन्।
यो नाउपाका मन्त्री विवादमा मुछिएको पहिलो पटक भने होइन। यसअघि लक्ष्मणकिशोर चौधरीले दीगो वन व्यवस्थापन कार्यविधिमा आर्थिक लेनदेन योजना बनाएको आरोपपछि राजीनामा दिएका थिए। त्यसपछि चौधरी मन्त्री नियुक्त भएका थिए। अब मन्त्री रामेश्वर चौधरीको भविष्य राजीनामा दिने या नदिने निर्णयमा निर्भर हुनेछ, तर मुख्यमन्त्रीको स्पष्ट असन्तुष्टिपछि दबाब बढेको छ।
