काठमाडौं । नेपाली कांग्रेसले पार्टीका केन्द्रीय सदस्य एवम् क्रियाशील सदस्यता छानबिन समितिका सदस्य श्यामकुमार घिमिरेमाथि आक्रमण गर्नेलाई कारवाही गर्न निर्देशन दिएको छ ।
प्रधानमन्त्री निवास बालुवाटारमा शनिबार बसेको कांग्रेस पदाधिकारी बैठकले क्रियाशील सदस्यता छानविनका क्रममा घिमिरेमाथि आक्रमणमा संलग्नलाई कारवाही गर्न पार्टीको अनुशासन समितिलाई निर्देशन दिएको हो ।
बैठकपछि कांग्रेस प्रवक्ता बिश्वप्रकाश शर्माले घटनामा संलग्न भएका व्यक्तिहरु उपर २४ घण्टाभित्र स्पष्टीकरण पत्र काटेर ३ दिनभित्र संगठनको अनुशासनको कारवाही गर्नका लागि निर्देशन दिएको जानकारी दिए । आवश्यक कारवाही गर्न अनुशासन समितिका संयोजक भीष्म आङ्देम्बेलेलाई पत्र जाने र अनुशासन समितिले आवश्यक कारवाही गर्ने उनले बताए ।
क्रियाशील सदस्यताको छानबिन स्थलमा पुगेर सांगठनिक कार्यमा व्यस्त रहेको समयमा एकाएक गरिएको आक्रमण पार्टीको अनुशासित सदस्यको परिचय हुन नसक्ने कांंग्रेसको ठहर छ ।
