काठमाडौं । रवि लामिछाने विरुद्धको सहकारी ठगी मुद्दामा चितवन जिल्ला अदालत ले वारेस राखेर मुद्दा प्रक्रिया अघि बढाउने अनुमति दिएको छ। यससँगै अब उनी प्रत्येक तारिखमा स्वयम् अदालत उपस्थित हुनुपर्ने बाध्यता हटेको छ।
जिल्ला न्यायाधीश केदारनाथ पौडेलको इजलासले लामिछानेको निवेदनमाथि सुनुवाइ गर्दै यस्तो आदेश दिएको हो। उनले स्वास्थ्य समस्याका कारण आफू अदालत उपस्थित हुन नसक्ने उल्लेख गर्दै वारेसमार्फत प्रतिनिधित्वको माग गरेका थिए।
अदालतमा पेश गरिएको त्रिवि शिक्षण अस्पताल को स्वास्थ्य परीक्षण प्रतिवेदनका आधारमा इजलासले अनुमति दिएको जनाएको छ। अब लामिछानेले आफ्नो प्रतिनिधिमार्फत कानुनी प्रक्रिया अगाडि बढाउन सक्नेछन्।
यस आदेशलाई कानुनी रूपमा सहजता प्रदान गर्ने निर्णयका रूपमा हेरिएको छ भने आलोचकहरूले भने यसले उच्च प्रोफाइल व्यक्तिलाई विशेष सुविधा दिएको सन्देश दिन सक्ने बताएका छन्।
