काठमाडौँ । पूर्वप्रधानमन्त्री तथा नेकपा एमालेका अध्यक्ष केपी शर्मा ओलीको पित्तथैलीमा देखिएको पत्थरी हटाउन त्रिवि शिक्षण अस्पताल, महाराजगन्जमा शल्यक्रिया भइरहेको छ। अस्पताल प्रशासनका अनुसार उनलाई अप्रेसन थिएटरमा लगेर विशेषज्ञ चिकित्सकको टोलीले प्रक्रिया अघि बढाएको हो।
अस्पतालका निर्देशक डा। सुवास आचार्यले शल्यक्रिया जारी रहेको पुष्टि गर्दै प्रक्रिया सम्पन्न भएपछि औपचारिक जानकारी सार्वजनिक गरिने बताए। चिकित्सक डा। पलेस्वाँ जोशी लाखेको नेतृत्वमा रहेको टोलीले पित्तथैलीमा रहेको करिब २२ एमएमको ढुंगा निकाल्ने तयारी गरेको अस्पताल स्रोतले जनाएको छ।
यसअघि ‘जेनजी आन्दोलन’ सम्बन्धी जाँचबुझ प्रतिवेदनका आधारमा प्रहरीले ओलीलाई चैत १३ गते भक्तपुरको गुण्डुस्थित निवासबाट नियन्त्रणमा लिएको थियो। स्वास्थ्यमा समस्या देखिएपछि सोही दिन उनलाई उपचारका लागि त्रिवि शिक्षण अस्पतालमा भर्ना गरिएको थियो। हाल शल्यक्रियाको प्रगति र स्वास्थ्य अवस्थाबारे थप विवरण अस्पतालले सार्वजनिक गर्ने अपेक्षा गरिएको छ।
