काठमाडौं । पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकको पक्राउ प्रकरणले सुर्खेतमा राजनीतिक ध्रुवीकरणभन्दा पनि असामान्य एकता देखाएको छ। नेकपा एमाले र नेपाली कांग्रेसले आइतबार संयुक्त प्रेस विज्ञप्ति जारी गर्दै वर्तमान सरकारको कदमप्रति कडा असहमति जनाएका हुन्।
दुवै दलले उक्त गिरफ्तारीलाई पूर्वाग्रही र प्रतिशोधपूर्ण कदमको संज्ञा दिएका छन्। उनीहरूको भनाइमा यो निर्णय लोकतान्त्रिक मूल्य, विधिको शासन तथा नागरिक स्वतन्त्रताको मर्मविपरीत छ। विज्ञप्तिमा भदौ २३ र २४ का घटनासम्बन्धी तयार पारिएको प्रतिवेदनमाथि पनि गम्भीर प्रश्न उठाइएको छ। गौरीबहादुर कार्की नेतृत्वको जाँचबुझ आयोगको प्रतिवेदनलाई अपूर्ण, एकपक्षीय र पूर्वाग्रहयुक्त ठहर गर्दै यसको निष्कर्षमाथि विश्वास गर्न नसकिने उल्लेख गरिएको छ।
त्यसैगरी, आयोगले आफ्नो कार्यक्षेत्र नाघेर राजनीतिक तथा संवैधानिक विषयमा टिप्पणी गरेको आरोप लगाउँदै शक्ति पृथकीकरणको सिद्धान्त उल्लंघन भएको दाबी गरिएको छ। दुवै दलले ओली र लेखकको तत्काल रिहाइको माग गरेका छन् भने उक्त प्रतिवेदन खारेज गर्नुपर्ने मागसमेत अघि सारेका छन्। साथै, घटनाको निष्पक्ष छानबिनका लागि नयाँ आयोग गठन गर्नुपर्नेमा उनीहरूको जोड छ। यो संयुक्त प्रतिक्रिया सुर्खेतमा मात्र होइन, राष्ट्रिय राजनीतिमा समेत नयाँ बहसको विषय बनेको छ।
