काठमाडौँ ।नेकपा एमाले का सचिव महेश बस्नेत ले प्रतिशोधको राजनीतिविरुद्ध आजैदेखि आन्दोलन सुरु गर्ने घोषणा गरेका छन्।
सामाजिक सञ्जालमार्फत उनले प्रदर्शनका कार्यक्रमबारे केही समयमै विस्तृत जानकारी दिने बताएका छन्। पूर्वप्रधानमन्त्री केपी शर्मा ओली र पूर्वगृहमन्त्री रमेश लेखक लाई गिरफ्तार गरिएको घटनाले देशमा द्वन्द्वको अवस्था सिर्जना हुन सक्ने उनको जिकिर छ।
बस्नेतले उक्त कदमलाई राजनीतिक प्रतिशोध र पूर्वाग्रहको संकेत भएको आरोप लगाएका छन्। साथै, उनले सुरक्षाकर्मीहरूको भूमिकाप्रति समेत असन्तुष्टि व्यक्त गरेका छन्।
उनले सामाजिक सञ्जालमा लेखेका छन्, “सरकारी सम्पदा र सम्पत्ति जोगाउन नसक्ने, आफ्नै चौकी सुरक्षित राख्न नसक्ने प्रहरीहरू आज लोकतन्त्रका लागि लडेका नेताहरूलाई गिरफ्तार गर्न ठूलो संख्यामा खटिएको देख्दा दुःख लाग्छ।”
उनका अनुसार राजनीतिक बन्दी नहुनु लोकतन्त्रको महत्वपूर्ण सूचक भए पनि पछिल्ला घटनाक्रमले देशको राजनीतिक अवस्थाप्रति चिन्ता बढाएको छ।
बस्नेतले बालेन शाह नेतृत्वको सरकारमाथि पनि आलोचना गर्दै गृहमन्त्री सुधन गुरुङ को नियुक्तिलाई विवादित र अनुभवहीन भन्दै टिप्पणी गरेका छन्।
एमालेले प्रतिशोधको राजनीतिबाट देशलाई जोगाउन तथा लोकतान्त्रिक मूल्य–मान्यता रक्षा गर्न आन्दोलनमा सहभागी हुन सर्वसाधारणलाई आह्वान गरेको छ।
