काठमाडौं । नेपाली कांग्रेसका प्रवक्ता देवराज चालिसेले गौरीबहादुर कार्की नेतृत्वको आयोगले दिएको प्रतिवेदन प्रथम दृष्टिमा नै अपूर्ण र अधुरो भएको बताएका छन् । बिहीबार सानेपास्थित पार्टी केन्द्रीय कार्यालयमा आयोजित पत्रकार सम्मेलनमा प्रवक्ता चालिसेले प्रतिवेदनमा भदौै २३ को आन्दोलनबारे प्रकाश पार्न खोजिएको भएतापनि २४ गतेको घटनालाई अलपत्र छाडिएको बताए ।
उनले भने,‘अहिले जेनजी आन्दोलनको विषयमा प्रतिवेदन आएको छ । यसलाई विशेषगरी के भन्छौँ भने प्रथम दृष्टिमा अपूर्ण र अधुरो देखियो । पूर्णता पाएको जस्तो देखिएको छैन । भदौ २३ को आन्दोलनबारे जति प्रकाश पार्न खोजिएको छ, २४ गतेको घटनालाई अलपत्र छाडिएका जस्तो देखियो । यद्यपी त्यो प्रतिवेदन थप गम्भीर अध्ययन गर्छौँ । हामीले एउटा धारणा बनाउन कानुनविद, प्रशासनमा अनुभव भएका, जेनजी आन्दोलनमा सहभागीहरुसँग छलफल गर्नेछौं ।’
उनले जनादेशबाहेक शासनको स्रोत अरु केही नभएको बताए । पार्टीले हारेपनि प्रणालीले हार्न नहुने उनको भनाइ छ । उनले भने, ‘देशको राजनीतिक परिवर्तनमा विशिष्ट स्थिति देखा परेको छ । लोकतन्त्रको विकल्प लोकतन्त्र नै हो । जनादेश बाहेक शासनको स्रोत अरु केही भन्ने कुरा स्थापित भएको छ । पार्टी हार्ने जित्ने भइरहन्छ, तर प्रणाली हार्न हुँदैन ।’
