काठमाडौं । खाडी क्षेत्रमा बढ्दो सुरक्षा जोखिमका कारण ७२ हजारभन्दा बढी नेपाली नागरिकले स्वदेश फर्किन आफ्नो विवरण दर्ता गराएका छन्। परराष्ट्र मन्त्रालय अन्तर्गतको कन्सुलर सेवा विभागले सञ्चालन गरेको अनलाइन दर्ता प्रणालीमार्फत आइतबार साँझसम्म दर्ता संख्या यसरी पुगेको हो।
फेब्रुअरी २८ मा अमेरिका र इजरायलले इरानमाथि आक्रमण गरेपछि सुरु भएको तनाव खाडी क्षेत्रसम्म फैलिएको छ। इरानले अमेरिकी सैन्य बेसहरूलाई लक्षित गर्दै जवाफी आक्रमण गरिरहेको र त्यसबाट त्यहाँ कार्यरत १७ लाखभन्दा बढी नेपालीको सुरक्षा जोखिम बढेको बताइएको छ।
सरकारले फागुन २१ गतेदेखि नेपाल फर्कन चाहनेहरूको विवरण संकलन सुरु गरेको थियो। कन्सुलर विभागका प्रवक्ता लोकबहादुर क्षेत्रीका अनुसार ७२ हजारभन्दा बढी विवरण दर्ता भइसकेको छ। दर्ता गरिएको सूची सम्बन्धित देशका नेपाली दूतावासले तयार पार्ने भएकाले अहिलेसम्म कति स्वदेश फर्किसके भन्ने सुनिश्चित संख्या छैन।
पश्चिम एसियामा तनाव बढेसँगै करिब २० हजार कामदार भिसा लिएर पनि जान नपाई नेपालमै रोकिएका छन्। नेपाल वैदेशिक रोजगार व्यवसायी संघका पूर्वअध्यक्ष राजेन्द्र भण्डारीले दैनिक सयौं नेपाली वैदेशिक रोजगारी गुमाइरहेको र विगतको मासिक औसतसँग तुलना गर्दा हालको अवस्था असाधारण भएको बताएका छन्।
परराष्ट्र मन्त्रालयले खाडी क्षेत्रका नेपालीको सुरक्षा, हित र कल्याणका लागि नेपाली नियोगहरू निरन्तर सक्रिय रहेको जनाएको छ। नियोगहरूले समस्या परेका नागरिकको उद्धार र सहायताका लागि समन्वय गरिरहेको र हवाई उडान, सुरक्षा सतर्कता र सूचना प्रणालीबारे नियमित अपडेट दिइरहेको छ।
अहिलेसम्म संयुक्त अरब इमिरेट्समा मात्र सीमित हवाई उडान सञ्चालन भइरहेका छन्। अन्य खाडी मुलुकमा उडान अझै नियमित नभए पनि आवश्यक सावधानी अपनाउँदै नेपालीहरूको सुरक्षित फिर्तीको व्यवस्था गर्न मन्त्रालय सक्रिय रहेको जनाएको छ।
