काठमाडौं । सरकारले इरानका नागरिकलाई नेपाल प्रवेश गर्दा दिँदै आएको ‘अन–अराइभल’ भिसा सेवा बन्द गर्ने निर्णय गरेको छ। मध्यपूर्व क्षेत्रमा बढ्दो सुरक्षा संवेदनशीलता र क्षेत्रीय तनावलाई ध्यानमा राख्दै गृह मन्त्रालयले यस्तो निर्णय गरेको जनाएको छ। अध्यागमन विभागले जारी गरेको विज्ञप्तिअनुसार अब सरकारी तथा कूटनीतिक राहदानीबाहेकका इरानी नागरिकले नेपाल आउनुअघि विदेशस्थित नेपाली दूतावास वा कूटनीतिक नियोगबाट पूर्वस्वीकृत भिसा लिनुपर्नेछ। यसअघि भने इरानी नागरिकले नेपाल प्रवेश गर्दा विमानस्थलमै ‘अन–अराइभल’ भिसा पाउने व्यवस्था थियो।
विभागका अनुसार गृह मन्त्रालयले २०८२ फागुन २९ गते मन्त्रीस्तरीय निर्णयमार्फत इरानका नागरिकलाई दिइँदै आएको उक्त सुविधा तत्कालका लागि स्थगित गरेको हो। सरकारको यो निर्णयसँगै ‘अन–अराइभल’ भिसा सुविधा नपाउने देशहरूको संख्या १३ पुगेको छ। यस सूचीमा नाइजेरिया, घाना, जिम्बाबे, स्वाजिल्याण्ड, क्यामेरुन, सोमालिया, लिबेरिया, इथोपिया, इराक, प्यालेस्टाइन, अफगानिस्तान र सिरियाका नागरिकहरू पहिले नै समावेश छन्। सरकारका अधिकारीहरूका अनुसार अन्तर्राष्ट्रिय परिस्थिति र सुरक्षा मूल्यांकनका आधारमा यस्तो निर्णय लिइएको हो। आवश्यक परे भविष्यमा उक्त व्यवस्थाबारे पुनरावलोकन गरिने संकेत पनि दिइएको छ।
