काठमाडौं । २१ फागुनमा सम्पन्न प्रतिनिधि सभा निर्वाचनका लागि काठमाडौंमा खटिएका निर्वाचन प्रहरीलाई बिहीबार तीनकुनेस्थित प्रहरी वृत्तबाट बिदाइ गरिएको छ। प्रहरी अधिकारीहरूले उनीहरूलाई टिका र खादा लगाएर सम्मानपूर्वक बिदाइ गरेका हुन्।
देशभर भएको निर्वाचनमा कुल ३ लाख ३३ हजार ९८० सुरक्षाकर्मी परिचालित थिए। यसमा नेपाली सेना ७९ हजार ७२७, नेपाल प्रहरी ७५ हजार ५९७, सशस्त्र प्रहरी ३४ हजार ५७६ र निर्वाचन प्रहरी १ लाख ३० हजार ९८० रहेका थिए।
सशस्त्र प्रहरी मातहत १५ हजार ११० निर्वाचन प्रहरी परिचालन थिए भने १ हजार ९२१ गुप्तचर पनि निर्वाचन कार्यमा खटिएका थिए।
निर्वाचन प्रहरीहरूलाई बिदाइ गर्दै प्रहरी प्रशासनले उनीहरूको योगदानको प्रशंसा गर्दै आगामी निर्वाचनमा पनि सुरक्षाको जिम्मेवारीमा समान तत्परता देखाउने अपेक्षा व्यक्त गरेको छ।
