काठमाडौं । सर्लाही निर्वाचन क्षेत्र नम्बर ४ मा मतदान नजिकिँदै गर्दा सम्भावित अवाञ्छित गतिविधिबारे सुरक्षा निकायले विशेष सतर्कता अपनाएको जनाइएको छ। प्राप्त सूचनाका आधारमा मतदानअघि कुनै ‘गम्भीर प्रकृतिको घटना’ हुन सक्ने संकेतपछि सुरक्षा संयन्त्र सक्रिय बनाइएको स्रोतले जनाएको छ। उक्त क्षेत्रमा यसपटक प्रतिस्पर्धा चासोको केन्द्रमा छ। नेपाली कांग्रेसका नेता उम्मेदवार रहेका छन् भने २०७९ को निर्वाचनमा स्वतन्त्र रूपमा विजयी भएका डा.अमरेशकुमार सिंह यसपटक नेतृत्वको राष्ट्रिय स्वतन्त्र पार्टीबाट मैदानमा छन्। पछिल्ला दिनमा दुवै पक्षले आक्रामक प्रचार अभियान चलाइरहेका छन्।
सुरक्षा स्रोतका अनुसार मतदानअघि मंगलबार वा बुधबार कुनै उक्साहटपूर्ण वा सहानुभूति बटुल्ने खालको घटना गराउन खोजिने सम्भावनाबारे सूचना प्राप्त भएको छ। यस्ता सूचनाको स्वतन्त्र पुष्टि नभए पनि सुरक्षा निकायले जोखिम आकलनका आधारमा निगरानी बढाएको जनाएको छ। “निर्वाचनको निष्पक्ष र शान्तिपूर्ण वातावरण कायम राख्न आवश्यक सबै तयारी गरिएको छ,” एक अधिकारीले बताए।
स्रोतका अनुसार बाह्य तत्व परिचालन गरेर नियोजित रूपमा अस्थिरता सिर्जना गर्न सकिने आशंकालाई समेत ध्यानमा राखिएको छ। यद्यपि यसबारे आधिकारिक रूपमा कुनै निकायले सार्वजनिक पुष्टि गरेको छैन। सुरक्षा संयन्त्रले सम्भावित झडप वा उक्साहट रोक्न संवेदनशील स्थानमा गस्ती, सूचनाको विश्लेषण र समन्वयलाई तीव्र बनाएको छ। निर्वाचन आयोग र स्थानीय प्रशासनले मतदातालाई हल्ला वा अपुष्ट सूचनामा नलाग्न आग्रह गरेका छन्। लोकतान्त्रिक प्रक्रियामा जनविश्वास कायम राख्न सबै दल र उम्मेदवारले संयमित अभिव्यक्ति दिनु तथा समर्थकलाई शान्त रहन आग्रह गर्नु आवश्यक रहेको सरोकारवालाको भनाइ छ।
सर्लाही–४ मा प्रतिस्पर्धा कडा बन्दै जाँदा सुरक्षा निकायले भने स्पष्ट सन्देश दिएको छ—कुनै पनि अवाञ्छित गतिविधि सह्य नहुने र मतदानलाई प्रभावित पार्ने प्रयासमा संलग्न जो–कोहीमाथि कानुनी कारबाही गरिनेछ।
