पोखरा । आयोजक सहारा क्लब २५ औं आहा ! रारा पोखरा गोल्डकप फुटबल प्रतियोगिताको च्याम्पियन बनेको छ ।
१२ वर्षपछि आहा रारा गोल्डकप जित्ने क्रममा सहाराले शनिबार सम्पन्न फाइनल खेलमा जावलाखेल युथ क्लबलाई २-० गोल अन्तरले पराजित गरेको हो ।
सहाराको जितमा मुकुन्द कुमार नुईरे र टाय डिनिएल बाडारुले एक एक गोल गरेका थिए । मुकुन्दले खेलको २५औं मिनेटमा गोल गरेका थिए भने टायले खेलको ७३औं मिनेटमा गोल गर्दै अग्रता दोब्बर पारेका थिए ।
यो सहाराको दोस्रो उपाधि हो । सहाराले यसअघि २०१४ मा मनाङ मर्स्याङ्दी क्लबलाई पराजित गर्दै पहिलो उपाधि जितेको थियो । आहा रारा पोखरा गोल्डकपको उपाधि सबै भन्दा बढी पटक जित्ने क्लब भने नेपाल पुलिस र मनाङ मर्स्याङ्दी हो । दुवैले ६-६ पटक यो उपाधि जितेका छन् ।
