इलाम।मेची राजमार्ग अन्तर्गत रोङ गाउँपालिका–कोल्बुङ क्षेत्रमा गएराति करिब ९ बजे सुख्खा पहिरो जाँदा सडक पूर्ण रूपमा अवरुद्ध भएको छ। पहिरोका कारण झापाबाट इलाम सदरमुकाम हुँदै पाँचथर र ताप्लेजुङतर्फ जाँदै गरेका यात्रुबाहक तथा मालवाहक सवारीसाधन अलपत्र परेका छन्।
सडक अवरुद्ध भएपछि सवारीसाधनहरू जोरकलस (झापा–इलाम सिमाना) क्षेत्रमा रोकिएका छन्। रातिदेखि नै यात्रुहरू गन्तव्यमा पुग्न नसक्दा सास्ती भोगिरहेका छन्। मालवाहक गाडी रोकिँदा दैनिक उपभोग्य सामग्रीको ढुवानीमा पनि असर परेको छ।
सडक डिभिजन कार्यालय इलामका अनुसार पहिरो हटाउने काम बिहानैदेखि सुरु गरिएको छ। आवश्यक उपकरणसहित प्राविधिक टोली परिचालन गरिएको र सकेसम्म छिटो सडक सञ्चालनमा ल्याउने प्रयास भइरहेको कार्यालयले जनाएको छ। कार्यालय प्रमुख पवन भट्टराईका अनुसार भिरालो भू–भाग र ढुंगा झर्ने जोखिमका कारण सडक पूर्ण रूपमा खुलाउन केही समय लाग्न सक्ने छ।
स्थानीय प्रशासनले सडक पूर्ण रूपमा सञ्चालनमा नआउँदासम्म सवारीसाधनलाई सुरक्षित स्थानमा राख्न र आवश्यक सावधानी अपनाउन आग्रह गरेको छ।
