काठमाडौं । एक हिंसात्मक घटनाले घर मात्र होइन, जीवनकै स्वरूप बदलिदियो। पूर्वप्रधानमन्त्री झलनाथ खनालकी पत्नी रविलक्ष्मी चित्रकारको घरमा पेट्रोल बम प्रहार भएपछि लागेको आगलागीले उनको शरीर गम्भीर रूपमा जलेको थियो। तर शारीरिक पीडाभन्दा ठूलो उनको मानसिक दृढता देखिएको छ। घटनाको दिन घरबाहिर प्रदर्शन उग्र बन्दै गएको थियो। ढुंगामुढापछि पेट्रोल बम प्रहार हुँदा घरमा आगो फैलियो। धुवाँ र ज्वालाबीच उनी माथिल्लो तलामा पुगिन्, तर सास फेर्नै नसक्ने अवस्थामा अचेत भइन्। सुरक्षाकर्मीले पछि उद्धार गरेर अस्पताल पुर्याए।
उपचारका क्रममा उनको देब्रे हात काट्नुपर्यो। गम्भीर जलन र त्यसपछि देखिएको निमोनियाले अवस्था जटिल बनायो। प्रारम्भिक उपचारपछि थप उपचारका लागि उनलाई भारतको नयाँ दिल्लीस्थित एपोलो अस्पताल लगियो। अहिले स्वास्थ्य अवस्था क्रमशः सुधारोन्मुख छ, तर पूर्ण रूपमा निको हुन अझै समय लाग्ने चिकित्सकको भनाइ छ। शारीरिक रूपमा कमजोर भए पनि मानसिक रूपमा उनी सशक्त देखिन्छिन्। “जे भइसक्यो, त्यसमा अल्झिएर बस्नुको अर्थ छैन,” भन्ने सोचका साथ उनी पुनः जीवनलाई सम्हाल्ने प्रयासमा छिन्। सेवा गर्ने हात गुमाएपछि आज दैनिक कामकाजमा अरूको सहारा लिनुपरेको छ, तर उनले धैर्य गुमाएकी छैनन्।
आगलागीमा घरसँगै महत्वपूर्ण पुस्तक र दुर्लभ दस्तावेजहरू नष्ट भए। पूर्वप्रधानमन्त्री खनालद्वारा लिखित कृतिहरू र पार्टी इतिहाससँग सम्बन्धित सामग्री खरानी बने। त्यसले उनलाई भावनात्मक रूपमा गहिरो चोट दिएको छ। उनी स्वास्थ्य प्रणालीको सीमितता र राज्यको भूमिकाप्रति पनि प्रश्न उठाउँछिन्। नेपालमै आवश्यक औषधि र बहुआयामिक उपचारको व्यवस्था नहुँदा विदेश जानुपरेको अनुभव उनले साझा गरेकी छन्।
राजनीतिक परिवारसँग जोडिएकै कारण यस्तो आक्रमणको सामना गर्नुपरे पनि उनले तिक्तता व्यक्त गरेकी छैनन्। बरु राजनीतिक दलहरूले जनताको आवाज सुन्नुपर्ने र देशको अवस्था सुधारतर्फ सबै एकजुट हुनुपर्नेमा जोड दिएकी छन्। गम्भीर घाउ र ठूलो क्षतिपछि पनि रविलक्ष्मी चित्रकारको सन्देश स्पष्ट छ—धैर्य, सकारात्मक सोच र सहनशीलता नै कठिन समय पार गर्ने सबैभन्दा ठूलो शक्ति हो।
