काठमाडौं । नेकपा एमालेको ११औँ राष्ट्रिय महाधिवेशनमा नयाँ नेतृत्व चयनलाई लिएर आन्तरिक प्रतिस्पर्धा चर्कँदै गएको छ । यसैक्रममा ईश्वर पोखरेल नेतृत्वको समूहले आफ्ना उम्मेदवारहरूको प्रारम्भिक सूची सार्वजनिक गरेको छ ।
पोखरेल समूहले महासचिव पदका लागि सुरेन्द्र पाण्डेलाई अघि सार्ने निर्णय गरेको छ । यस्तै उपाध्यक्ष पदमा गोकर्ण विष्ट र उपमहासचिव पदमा योगेश भट्टराईलाई उम्मेदवार बनाउने सहमति भएको समूहका एक नेताले जानकारी दिए ।
अन्य पदाधिकारी तथा केन्द्रीय सदस्यका उम्मेदवार टुंग्याउन समूहभित्र छलफल अझै जारी रहेको बताइएको छ । सीमित पदमा आकांक्षी धेरै भएकाले बाँकी नाम अन्तिम चरणमा निर्णय गरिने जनाइएको छ ।
महाधिवेशन कार्यतालिकाअनुसार मंगलबार मतदान हुने तयारी भइरहेका बेला अध्यक्ष केपी शर्मा ओलीसँग नेतृत्व प्रतिस्पर्धामा पोखरेल समूहले औपचारिक चुनौती प्रस्तुत गर्न थालेको राजनीतिक विश्लेषकहरूको भनाइ छ ।
