काठमाडौं । सहकारी क्षेत्रमै देखिएको दोहोरो जिम्मेवारी र स्वार्थको द्वन्द्वलाई हटाउन सहकारी विभागले कडाइका साथ ‘एक व्यक्ति–एक पद’ नीति कार्यान्वयन गर्न निर्देशन जारी गरेको छ। अब कुनै पनि सञ्चालक एकै समयमा एकभन्दा बढी सहकारीमा पदाधिकारी बस्न नपाउने प्रावधानलाई विभागले कडाभन्दा कडा रूपमा लागू गर्ने जनाएको छ।
सहकारी ऐन, २०७४ का दफा ४१ र दफा ४४ को प्रावधानलाई कार्यान्वयन गर्न विभागले सोमबार सबै सहकारीलाई सूचना पठाउँदै कानुनविपरीत दोहोरो वा तेहरो पदमा बसेका सञ्चालकलाई तत्काल व्यवस्था मिलाउन निर्देशन दिएको हो। दफा ४१ ले एक व्यक्तिले एकै समयमा एक मात्र सहकारीको सञ्चालक हुन पाउने व्यवस्था गरेको छ भने दफा ४४ ले एउटै समय दुई सहकारीमा सञ्चालक रहन नसक्ने स्पष्ट प्रावधान राखेको छ।
विभागले पछिल्लो अनुगमनमा केही व्यक्तिहरू अझै पनि धेरै सहकारीमा संचालक बनेर बसेको भेटिएको भन्दै अब कानुन उल्लंघन गर्ने सहकारी तथा व्यक्तिमाथि कारबाही हुने चेतावनी दिएको छ। सहकारी नियमन प्राधिकरणदेखि नेपाल राष्ट्र बैंकसम्मका निर्देशन र मापदण्डले पनि बचत–ऋण मुख्य कारोबार गर्ने सहकारीमा दोहोरो पदाधिकारितालाई निषेध गर्दै आएको भए पनि कार्यान्वयन ढिलो भएको विभागको बुझाइ छ।
विभागका अनुसार ‘एक व्यक्ति–एक पद’ मापदण्डले सहकारीमा सुशासन बढाउने, स्रोत–साधनको दुरुपयोग रोक्ने र निर्णय प्रक्रियामा पारदर्शिता ल्याउने उद्देश्य राखेको छ। मन्त्रालय तथा नियमनकारी निकायहरूले अनुगमनका क्रममा कानुनको पालन नदेखिए सहकारी ऐन तथा नियमावलीअनुसार आवश्यक कारबाही अघि बढाइने चेतावनीसमेत विभागले दोहऱ्याएको छ।
