काठमाडौं । अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईसहित १० जना हाइ प्रोफाइल व्यक्तिलाई ज्यान मार्ने धम्की दिने समूहको मुख्य व्यक्ति इन्डोनेसियामा रहेको प्रहरी अनुसन्धानबाट पुष्टि भएको छ। सामाजिक सञ्जालमार्फत भिडियो सार्वजनिक गर्दै आफूलाई उग्रवादी संगठनको अध्यक्ष बताउने प्रकाश पाठक नामका युवकले धम्की दिएको खुलेको हो।
काभ्रे घर भएका पाठकले इन्डोनेसियाबाट भिडियो पोस्ट गरी लोकमानसिंह कार्की, गोपालबहादुर खड्का, रमेश लेखक, बालकृष्ण खाण, आरजु राणा, ओमविक्रम राणालगायत १० जनालाई ‘सफाया गर्ने’ चेतावनी दिएका थिए। अनुसन्धानमा संलग्न एक प्रहरी अधिकारीका अनुसार उनी हाल इन्डोनेसियाबाटै सक्रिय रहेको देखिन्छ।
घटना सार्वजनिक भएपछि उपत्यका प्रहरी कार्यालयले मंसिर १७ गते धम्की दिइएका सबै व्यक्तिको निवास, आवतजावत मार्ग र कार्यक्रमस्थलमा सुरक्षा निगरानी बढाउन निर्देशन जारी गरेको थियो। उपत्यका अपराध अनुसन्धान कार्यालय र जिल्ला प्रहरी परिसर काठमाडौंले संयुक्त रूपमा अनुसन्धान अघि बढाइरहेका छन्।
प्रकाश पाठकसँग सम्पर्कमा रहेका तीन जनालाई प्रहरीले नियन्त्रणमा लिएर सोधपुछ गरिरहेको एसपी पवन भट्टराईले जानकारी दिए। पक्राउ परेकामध्ये शरणजंग शाही, तोरण थापा मगर र धिरेन्द्र सुनार रहेको प्रहरीले जनाएको छ, तर उनीहरूको नाम औपचारिक रूपमा सार्वजनिक गरिएको छैन। उनीहरूलाई काठमाडौंको भद्रकालीस्थित प्रहरी हिरासतमा राखिएको छ।
आफूलाई ‘एक्स्ट्रीमिस्ट ग्रुप अफ नेपाल’ का अध्यक्ष दाबी गर्ने पाठकले भिडियोमा ‘अख्तियार प्रमुखले राजीनामा नदिए कारबाही गर्ने’ चेतावनी दिएका थिए। पहिलो भिडियोपछि उनले आइतबार दोस्रो भिडियो समेत सार्वजनिक गरेका छन्। आफू भारतमा रहेको दाबी गर्दैनै, उनी वास्तवमा इन्डोनेसियामा लुकेर बसेको प्रमाण प्रहरीले पाएको छ।
परिवारको भनाइ अनुसार पाठक केही समयदेखि सम्पर्कविहीन छन्। घरबाट ‘भारत जान्छु’ भन्दै निस्किएका उनले डाक्टर पढ़्ने योजना उल्लेख गरेको भए पनि उनको वास्तविकता प्रष्ट नभएको अनुसन्धान अधिकृतहरूले बताएका छन्।
