काठमाडौं । गायिका नितु पौडेलको मृत्यु पछि घटनाको रहस्य झन् गहिरिँदै गएको छ। पौडेलका दाइ गणेश पौडेल आज बिहान गायक बाबुल गिरीविरुद्ध औपचारिक जाहेरी दर्ता गर्न प्रहरी वृत्त सिंहदरबार पुगेका छन्। उनले आफ्नी बहिनीको “हत्या गरिएको” दाबी गर्दै कर्तव्य ज्यानको मुद्दा दर्ता गराउन माग गरेका हुन्।
“यो आत्मदाह होइन, योजनाबद्ध हत्या हो” — दाइ गणेश पौडेल
गणेश पौडेलले भने, “म जाहेरी लिएर प्रहरी कार्यालय पुगेको छु। यो आत्मदाह होइन, योजनाबद्ध हत्या हो। दुई जनामात्र भएको कोठामा कसरी आगो लाग्यो ? त्यसको जवाफ चाहिन्छ।” उनका अनुसार, नितु र बाबुल गिरीबीच करिब ८–९ वर्षदेखिको प्रेम सम्बन्ध थियो। तर पछिल्ला वर्षहरूमा सम्बन्धमा तनाव बढेको बताउँदै उनले आरोप लगाए —“त्यही झगडाको चरम रूप हत्या भएर अन्त्य भयो। मेरो बहिनीलाई पेट्रोल छर्केर जलाइएको हो।”
स्टुडियोभित्रको रहस्यमय आगो
१ कात्तिकमा अनामनगरस्थित बाबुल गिरीकै रेकर्डिङ स्टुडियोभित्र आगलागी भएको थियो। प्रारम्भिक विवरणअनुसार नितुले आफैंमाथि पेट्रोल छर्केर आत्मदाह प्रयास गरेकी थिइन्। तर घटना एकान्त कोठामा भएको र अन्य प्रत्यक्षदर्शी नभएको कारण घटनाको प्रकृति शंकास्पद बनेको छ।
बाबुल गिरीले भने प्रहरीसमक्ष दिएको बयानमा भनेका छन्, “नितुले आफैं आगो लगाएकी थिइन्, म निभाउने प्रयासमा लाग्दा सामान्य घाइते भएको हुँ।” तर पौडेल परिवारले यो बयानलाई “आफूलाई बचाउन गरिएको बनावटी कथा” भन्दै खारेज गरेको छ।
प्रहरीको अनुसन्धान र मौनता
जिल्ला प्रहरी परिसरका एसपी पवनकुमार भट्टराईले नितु पौडेलको मृत्युको पुष्टि गर्दै अनुसन्धान जारी रहेको बताएका छन्। “बाबुल गिरी प्रहरी सम्पर्कमै छन्। हालसम्म जाहेरी नआएको थियो, तर अब परिवारको उजुरीपछि कानुनी प्रक्रिया अघि बढ्नेछ,”भनाइ छ। प्रहरीले घटनास्थलका फरेन्सिक प्रमाणहरू संकलन गरेको र बर्न अस्पतालको पोस्टमार्टम रिपोर्ट पर्खिरहेको जनाएको छ। नितु पौडेलले किन आत्मदाहको बाटो रोजिन् ? यदि त्यो आत्मदाह हो भने, बाबुल गिरी कहाँ थिए ?
उनले निभाउने प्रयास गरेको दाबी सत्य हो कि प्रमाण मेटाउने प्रयास ? यी सबै प्रश्नहरूले यो घटनालाई साधारण प्रेम–त्रासदी होइन, गम्भीर आपराधिक अनुसन्धानको विषय बनाइदिएका छन्।
नितु पौडेलको मृत्युले नेपाली मनोरञ्जन जगत र समाजमा महिला कलाकारमाथिको दबाब, सम्बन्ध हिंसा र मानसिक स्वास्थ्य जस्ता विषय पुनः सतहमा ल्याएको छ। यदि यो आत्महत्या हो भने किन उनले यस्तो कदम चालिन् ? र यदि हत्या हो भने, किन यसलाई आत्मदाहको कथा बनाउन खोजियो ?
न्याय खोज्दै एक परिवार
गणेश पौडेलले प्रहरीलाई जाहेरी बुझाएपछि भनेका छन् —“हामी बहिनीको न्याय नपाइन्जेल चुप लाग्दैनौं। कलाकार मात्रै होइन, दिदीबहिनीहरूको सुरक्षाको सवाल हो यो।” अब प्रहरी अनुसन्धानले बाबुल गिरी निर्दोष साबित गर्छ वा दोषी ठहर्याउँछ — त्यो आगामी केही दिनमा स्पष्ट हुनेछ। तर अहिलेका लागि प्रश्न एउटै छ — नितु पौडेलले आगो लगाइन्, वा कसैले उनको आवाज सधैंका लागि निभाइदियो ?
