काठमाडौं । सञ्चार तथा सूचना प्रविधि मन्त्री जगदीश खरेल र नेपालका लागि अमेरिकी राजदूत डिन आर. थम्पसनबीच बिहीबार सिंहदरबारमा भेटवार्ता भएको छ ।
मन्त्रालयमा भएको भेटवार्तामा नेपाल–अमेरिका सम्बन्ध, आपसी सहयोग, सञ्चार तथा सूचना प्रविधि क्षेत्रमा सहकार्यका सम्भावनाबारे छलफल भएको मन्त्रालयले जनाएको छ ।
भेटमा मन्त्री खरेलले नेपालको सञ्चार क्षेत्रमा भइरहेको सुधार प्रयास, डिजिटल रूपान्तरण, सञ्चार पूर्वाधार विस्तार र सञ्चारकर्मीहरूको क्षमतावृद्धि विषयमा जानकारी गराएका थिए ।
उनले लोकतान्त्रिक अभ्यास सुदृढ पार्न सञ्चार क्षेत्र महत्वपूर्ण माध्यम भएको भन्दै यस क्षेत्रमा अमेरिका लगायत अन्तर्राष्ट्रिय समुदायसँगको सहकार्य उपयोगी हुने बताए ।
त्यसैगरी, राजदूत थम्पसनले नेपाल र अमेरिकाबीचको मित्रवत् सम्बन्धलाई अझ सुदृढ पार्ने इच्छा व्यक्त गर्दै दुवै देशबीच सञ्चार, प्रविधि र लोकतान्त्रिक अभ्यास प्रवर्द्धनमा सहकार्य गर्ने प्रतिबद्धता जनाएका थिए ।
