काठमाडौँ। अर्थ मन्त्रालयमा हालसम्म दुई सचिव रहेकोमा सरकारले एक सचिव मात्र राख्ने निर्णय गरेको छ। अर्थमन्त्री रामेश्वर खनालको प्रस्तावमा मंगलबारको मन्त्रिपरिषद् बैठकले सरुवा गर्दै तत्कालका लागि एक सचिवले मात्रै जिम्मेवारी सम्हाल्ने व्यवस्था गरेको हो।
हाल अर्थसचिवमा घनश्याम उपाध्याय कार्यरत छन्। राजस्व सचिव दिनेश घिमिरेलाई सरुवा गरेर प्राकृतिक स्रोत तथा वित्त आयोगको सचिवको जिम्मेवारी दिइएको छ। पूर्वमा अर्थ मन्त्रालयमा राजस्व सचिव अलग्गै रहने अभ्यास थियो, तर नयाँ व्यवस्थाअनुसार अर्को सचिव आवश्यक नरहेको निर्णय गरिएको छ।
अर्थ मन्त्रालय अन्तर्गत महालेखा नियन्त्रकको जिम्मेवारीमा सचिव शोभाकान्त पौडेल कार्यरत छन्। वित्तीय संघीयता महाशाखा प्रमुख महेश बराललाई तालिम केन्द्रमा सरुवा गरिएको छ।
