काठमाडौं । जेनजी आन्दोलनको क्रममा ज्यान गुमाएका चार युवाको आज पशुपति आर्यघाटमा अन्त्येष्टि गरिएको छ। त्रिवि शिक्षण अस्पतालमा पोष्टमार्टम गरिएको मृतकहरूको शव अभिभावक र आफन्तले पशुपति आर्यघाटमा लिएर गए। अन्तिम बिदाइको क्रममा परिवार र आफन्त भावविह्वल बनेका थिए।
यो आन्दोलनका क्रममा भदौ २३ र २४ गते मृत्यु हुनेहरूको संख्या ५१ पुगेको छ, जसमा तीन प्रहरी र एक भारतीय महिला पनि रहेका छन्। पहिलो दिनको प्रदर्शनमा मात्रै २१ जनाको मृत्यु भएको थियो। बाल सुधार गृहमा रहेका पाँच जना र प्रहरी तीनजनाको पनि मृत्यु भएको प्रहरीले पुष्टि गरेको छ।
मृतकहरू काठमाडौं उपत्यका मात्र नभई अन्य जिल्लाका पनि रहेका थिए। प्रदर्शनमा ज्यान गुमाउनेहरूमाथि नागरिक समाज, परिवार र साथीहरूले गहिरो शोक व्यक्त गरेका छन्।
अन्त्येष्टि कार्यक्रममा भावनात्मक दृश्यहरूले उपस्थित सबैलाई छुन पुग्यो। सामाजिक सञ्जाल र समाचार माध्यममा मृतकहरूको श्रद्धाञ्जलीका तस्बिरहरू समेत साझा गरिएको छ।
