ललितपुर। ललितपुरको ग्वार्को स्थित ओभर पासको प्रधानमन्त्री केपी शर्मा ओलीले उद्घाटन गरेका छन्।शुक्रबार प्रधानमन्त्री ओलीको उपस्थितिमा काठमाडौं उपत्यका ट्राफिक प्रहरी कार्यालय प्रमुख एसएसपी नवराज अधिकारीले रिबन काटेर उद्घाटन गरेका हुन्।
उद्घाटनपछि ओभर पासमा आजैबाट सवारी साधन सञ्चालन गर्ने तयारी गरिएको छ।गएको शनिबार भौतिक पूर्वाधार तथा यातायात मन्त्री देवेन्द्र दाहालसहित सडक विभागको नेतृत्वले स्थलगत निरीक्षण गरी सवारी साधन सञ्चालनको तयारी गर्न निर्देशन दिएको थियो।
चक्रपथको सातदोबाटो–कोटेश्वर सडक खण्ड तथा मंगलबजार–इमाडोल–लुभू मार्गमा सवारी चाप कम गर्नका लागि सरकारले ग्वार्कोमा यो बहुप्रतिक्षित ओभरपास निर्माण गरेको हो। अब चक्रपथ हुँदै गुड्ने सवारी साधनहरू फ्लाई ओभरमार्फत रोकावटबिनै अगाडि बढ्न सक्नेछन्, भने मंगलबजार–इमाडोल दिशातर्फ गएका वा आएका सवारीहरू भने पुलमुनिबाट सञ्चालन हुनेछन्।
निर्माण प्रक्रिया
यो आयोजना भौतिक पूर्वाधार तथा यातायात मन्त्रालयअन्तर्गतको सडक विभाग, गुणस्तर अनुसन्धान तथा विकास केन्द्रले अगाडि बढाएको हो।
२०७८ साल फागुन १२ गते आशिष-समानान्तर रेलिगेर जेभी निर्माण कम्पनीसँग दुई वर्षभित्र निर्माण सम्पन्न गर्ने गरी ठेक्का सम्झौता गरिएको थियो। तर समयमा काम नसकिएपछि म्याद दुईपटक थप्दै अन्ततः २०८१ साल पुस ८ गतेसम्मको समयसीमा कायम गरिएको थियो। निर्माणका क्रममा विभिन्न प्राविधिक र वातावरणीय समस्याले गर्दा गत पुस र माघमा झण्डै एक महिना काम रोकिएको थियो।
लागत र हर्जाना
निर्माण ढिलो भएपछि कम्पनीलाई हालसम्म करिब १ करोड ४७ लाख रुपैयाँ हर्जाना तिराइएको छ। सुरुमा १७ करोड ६ लाख रुपैयाँको लागत अनुमान गरिएको भए पनि अन्तिममा कुल लागत ३१ करोड ४६ लाख रुपैयाँ पुगेको छ — जुन प्रारम्भिक अनुमानभन्दा १४ करोड बढी हो।
संरचनाको विवरण
ग्वार्को ओभरपासको कुल लम्बाइ ५७६.२ मिटर छ, जसमा ग्वार्को चोकदेखि लगनखेलतर्फ ३२० मिटर र सातदोबाटोतर्फ १८५ मिटर लम्बाइको र्याम्प छ। बीचको पुल खण्ड ३६.२ मिटर लामो छ। ओभरपासको चौडाइ १६.४ मिटर रहेको छ, जसमा चार लेन सवारी साधन सञ्चालन गर्न मिल्ने गरी निर्माण गरिएको हो।
र्याम्पको चौडाइ १०.२ मिटर रहेको छ भने सडक दुवैतर्फ कालोपत्र गरिएको छ। निर्माणका क्रममा सातदोबाटो तर्फको जग असमान रुपमा थिचिएकोले निर्माणमा समय बढी लागेको प्रवक्ता प्रदीप भण्डारीले जानकारी दिए।
दीर्घकालीन ग्यारेन्टी
ठेक्का सम्झौताअनुसार निर्माण कम्पनीले निर्माणपछि पाँच वर्षसम्म निर्माण गुणस्तरमा र दश वर्षसम्म डिजाइनमा कुनै समस्या आएमा निःशुल्क सुधार गर्नुपर्ने व्यवस्था गरिएको छ।
