काठमाडौं । फेसबुकमा ‘अलविदा’ भन्दै मर्मस्पर्शी सन्देश लेखेपछि सम्पर्कविहीन भएका डाक्टर केशव श्रेष्ठ काठमाडौंको बालाजुमा फेला परेका छन्। जिल्ला प्रहरी परिसर, काठमाडौंका प्रमुख एसएसपी विश्व अधिकारीका अनुसार डा. श्रेष्ठलाई बालाजु क्षेत्रबाट सकुशल उद्धार गरिएको हो। उद्धारपछि उनलाई प्रहरी टोलीले भद्रकालीस्थित परिसरतर्फ ल्याइरहेको जानकारी दिएको छ।
यसअघि सामाजिक सञ्जालमार्फत आफ्नो सरुवाप्रति असन्तुष्टि जनाउँदै ‘अलविदा’ लेखेका श्रेष्ठको अवस्थाबारे परिवार, सहकर्मी र नागरिकमा गहिरो चिन्ता पैदा भएको थियो। उनी केही दिनदेखि सम्पर्कविहीन थिए। स्वास्थ्य मन्त्रालयको निर्णयविरुद्ध असन्तुष्टि जनाउँदै श्रेष्ठले सार्वजनिक रूपमा राजनीतिक हस्तक्षेप, व्यक्तिगत दबाब र अनैतिक प्रस्तावहरू स्वीकार नगरेको कारणले सरुवा गरिएको दाबी गरेका थिए।
उनले लेखेका शब्दहरूले मानसिक अस्थिरता र आत्महत्या प्रयासको आशंका गरिएको थियो, जसले प्रहरीलाई सक्रिय बनायो। प्रहरीको तत्काल खोजी कार्यपछि उनी बालाजु क्षेत्रबाट जीवन्त अवस्थामा फेला परेका हुन्। उनलाई थप स्वास्थ्य परीक्षण र मानसिक सल्लाहका लागि अस्पताल लैजाने तयारी भइरहेको स्रोतले जनाएको छ।
