काठमाडौं । जनता समाजवादी पार्टी (जसपा) नेपालका मधेश प्रदेश सांसद सरोजसिंह कुशवाहा विकास योजनामा अनियमितता गरेको आरोपमा पक्राउ परेपछि सांसद पदबाट निलम्बन गरिएका छन्। शुक्रबारको मधेश प्रदेश सभा बैठकमा सभामुख रामचन्द्र मण्डलले कुशवाहाको निलम्बनबारे सदनलाई जानकारी गराए। यो जानकारीसँगै प्रदेश संसदमा यो विषय गम्भीर बहसको विषय बनेको छ।
कुशवाहामाथि संसदीय विकास कोष अन्तर्गतको योजनामा उपभोक्ता समिति गठनको नाममा अनियमितता गरेको आरोप छ। अख्तियार दुरुपयोग अनुसन्धान आयोगले अनुसन्धानका क्रममा उनलाई काठमाडौंको अनामनगरबाट बिहीबार पक्राउ गरेको हो।
यसअघि जेठ १२ गते कुशवाहाको घरमा छापा मारिएको थियो। छापाको क्रममा उनका स्वकीय सचिव विनोदलाल कर्णलाई पनि नियन्त्रणमा लिएको अख्तियारले जनाएको छ। मधेश प्रदेशका सांसदमाथिको भ्रष्टाचार आरोपले प्रदेश संसदमा नै हलचल ल्याएको छ। संसदीय कोषको पारदर्शिता र दुरुपयोगको विषय फेरि एकपटक सार्वजनिक बहसको केन्द्रमा आएको छ।
