अमेरिका र साउदी अरबले १ खर्ब ४२ अर्ब डलरको हतियार सम्झौता गरेका छन् ।अमेरिकी राष्ट्रपति डोनाल्ड ट्रम्पको भ्रमणका क्रममा साउदी अरबले एक दर्जनभन्दा बढी अमेरिकी रक्षा फर्महरूबाट अत्याधुनिक युद्ध लडाइँ सम्बन्धी उपकरण तथा सेवाहरू लिने गरी अमेरिकासँग सम्झौता गरेको हो ।
सम्झौतामा वायु सेनाको उन्नति र अन्तरिक्ष क्षमता, हवाई तथा क्षेप्यास्त्र रक्षा, समुद्री तथा तटीय सुरक्षा, सीमा सुरक्षा र स्थल सेनाको आधुनिकीकरण तथा सूचना तथा सञ्चार प्रणालीको स्तरोन्नति लगायतका विषय समावेश छन् ।
त्यस्तै दुई देशबीच ऊर्जा, खनिज स्रोत, संक्रामक रोगसम्बन्धी सहयोग लगायत विषयमा पनि सहमति भएको छ । साउदी अरबले ‘अमेरिकामा लगानी गर्ने प्रतिबद्धता’ समेत जनाएको ह्वाइट हाउसले जनाएको छ ।
अन्तर्राष्ट्रिय सञ्चार माध्यमका अनुसार अमेरिकी प्रविधि फर्महरूबाट दुवै देशमा अत्याधुनिक रूपान्तरणकारी प्रविधिमा ८० अर्ब डलर लगानी गर्ने प्रतिबद्धता गरेका छन् । त्यस्तै, साउदी अरबले १४ अर्ब २० करोड डलरको ग्यास टर्बाइन र ऊर्जा समाधान तथा ४ अर्ब ८० करोड डलरको बोइङ यात्रुवाहक विमान निर्यात गर्ने भएको छ ।
सम्झौतामा राष्ट्रपति ट्रम्प र साउदीका युवराज मोहम्मद बिन सलमानले हस्ताक्षर गरेका हुन् । दुई देशबीच भएको सम्झौता इतिहासकै ठूलो रक्षा सम्झौता भएको ह्वाइट हाउसको भनाइ छ । राष्ट्रपति ट्रम्प पश्चिम एसियाको चार दिने भ्रमणका क्रममा मंगलबार साउदी अरबको राजधानी रियाद पुगेका हुन् । उनले कतार र संयुक्त अरब इमिरेट्स यूएईको भ्रमणपनि गर्नेछन ।
यसैबीच, अमेरिकाले सिरियामाथिको प्रतिबन्ध हटाउने घोषणा गरेको छ । साउदी अरेबियाका राजधानी रियादमा बोल्दै ट्रम्पले सिरियाविरुद्ध लगाइएका सबै प्रतिबन्ध हटाउने घोषणा गरेका हुन् ।
