काठमाडौं । भारत र पाकिस्तानबीच पछिल्लो समयमा चुलिएको तनावप्रति नेपालले गहिरो चिन्ता व्यक्त गर्दै आतंकवादविरुद्ध सधैं दृढ समर्थन रहने स्पष्ट पारेको छ।
परराष्ट्र मन्त्रालयले बिहीबार सार्वजनिक गरेको विज्ञप्तिमा, नेपालले २२ अप्रिलमा भारतको पहलगाममा पर्यटकमाथि भएको आतंकवादी आक्रमणको दृढ निन्दा गर्दै, त्यस घटनामा एक नेपाली नागरिकले ज्यान गुमाएको दुःखद क्षणमा भारतसँग ऐक्यबद्धता जनाएको छ।
‘नेपालले सबै प्रकारका आतंकवादविरुद्ध स्पष्ट र अटल अडान लिएको छ,’ विज्ञप्तिमा भनिएको छ, ‘छिमेकी राष्ट्रविरुद्ध नेपाली भूमि प्रयोग हुन नदिने प्रतिबद्धता पुनः दोहोर्याउँछौं।’
यद्यपि भारतले पाकिस्तानमा गरेको मिसाइल प्रहारबारे विज्ञप्तिमा स्पष्ट उल्लेख गरिएको छैन, नेपालले दुवै पक्षलाई संयम अपनाउन र क्षेत्रीय शान्तिको लागि पहल गर्न आग्रह गरेको छ।
नेपालको धारणा आक्रमणपछि करिब दुई दिनपछि सार्वजनिक गरिएको हो। क्षेत्रीय स्थायित्व र कूटनीतिक समाधानप्रति नेपालको जोड अझै बलियो देखिएको छ।
