काठमाडौँ। काठमाडौँदेखि मुगुको रमणीय रारा तालसम्म पर्यटक बस सेवा सञ्चालनको सम्भाव्यता अध्ययन गर्न टुरिस्ट बस एसोसिएसन अफ नेपाल (टीबान) को पहलमा एक विशेष भ्रमण टोली आज काठमाडौंबाट प्रस्थान गरेको छ। पर्यटन व्यवसायीहरू पर्यटक बसमा रारा पुगी सडकको अवस्था र समग्र यात्राको स्थिति बुझ्ने उद्देश्यले नेपाल पर्यटन बोर्डको प्राङ्गणबाट रारातर्फ लागेका हुन्।
भ्रमण टोलीलाई बिदाइ गर्दै नेपाल पर्यटन बोर्डका वरिष्ठ निर्देशक हिक्मत सिंह ऐरले काठमाडौँलाई रारासँग जोड्ने यो अभियानको थालनी भएकोमा खुसी व्यक्त गरे। उनले भने, “काठमाडौँलाई रारासँग जोड्ने अभियान सुरु भएकोमा निकै खुसी लागेको छ। पर्यटकलाई काठमाडौँबाट कर्णालीको रारासम्म सडक यातायातमार्फत पुग्न सकिन्छ भन्ने सन्देश दिन गरिएको यो प्रयास सफल हुने विश्वास लिएका छौँ।” यो भ्रमणले रारा अब टाढा छैन भन्ने सन्देश प्रवाह गर्ने र आन्तरिक तथा क्षेत्रीय पर्यटन प्रवर्द्धनमा महत्वपूर्ण योगदान पुर्याउने उनको भनाइ छ।
टुरिस्ट बस एसोसिएसन अफ नेपालका अध्यक्ष भिष्म न्यौपानेले काठमाडौँदेखि रारासम्मको यात्राको सम्भावना र व्यवस्थापनको अध्ययन गर्न यो यात्रा फलदायी हुने बताए। उनले भने, “सडक र भौतिक पूर्वाधारको अवस्था सामान्य र सहज देखिएको छ। हामी यस यात्राका क्रममा आइपर्ने कठिनाइ र सम्भावनाको सूक्ष्म अध्ययनपछि थप योजनाबद्ध रूपमा अघि बढ्नेछौँ।”
टीबानका पूर्वअध्यक्ष कृष्ण आचार्यले सडकमार्फत रारा यात्रा पूर्ण रूपमा सम्भव रहेको बताए। उनले भने, “काठमाडौँदेखि रारा जाने यो उपयुक्त मौसम हो। काठमाडौँबाट बस यात्रा गराएर रारा पुर्याउन सक्यौँ र यसका लागि थप आकर्षक प्याकेजहरू बनाउन सक्यौँ भने रारामा पर्यटकको संख्यामा उल्लेख्य वृद्धि हुनेछ।”
भ्रमण टोलीमा पर्यटन व्यवसायी र सरोकारवाला निकायका प्रतिनिधिहरूको सहभागिता रहेको छ। अध्ययनपश्चात् नियमित पर्यटक बस सेवा सञ्चालन गर्ने तयारी रहेको जनाइएको छ।
