काठमाडौं । सरकारी सरह निर्वाह भत्ताको माग र कार्यस्थल सुरक्षाका विषयमा स्वास्थ्य मन्त्री प्रदीप पौडेल र चिकित्सक प्रतिनिधिहरूबीच वार्ता जारी छ। नेपाल चिकित्सक संघ, आवासीय चिकित्सक र स्वास्थ्यकर्मीका लागि सुरक्षित कार्यस्थल संघर्ष समितिका प्रतिनिधिहरू मन्त्रालयमा भेटघाटमा जुटेका छन्।
वार्तामा संघका अध्यक्ष डा. अनिल कार्की, संघर्ष समितिका संयोजक डा। शेषराज घिमिरे, कर्णाली स्वास्थ्य विज्ञान प्रतिष्ठानका पूर्व उपकुलपति डा। मंगल रावललगायतको उपस्थिति रहेको छ।
निजी मेडिकल कलेजमा कार्यरत आवासीय चिकित्सकले लामो समयदेखि सरकारी सेवा जस्तै तलब सुविधा माग गर्दै आएका छन्। उनीहरूले आज बिहान माइतीघर मण्डलामा प्रदर्शनसमेत गरे। माग सम्बोधन नभए शुक्रबारबाट आकस्मिक बाहेक सबै सेवा बन्द गर्ने चेतावनी दिएका छन्।
स्वास्थ्यकर्मीहरूको आन्दोलनको मूल जरो २५ माघमा बसेको चिकित्सा शिक्षा आयोगको निर्णयमा छ, जसले निजी मेडिकल कलेजलाई आवासीय चिकित्सकलाई आठौं तहको तलब सुविधा दिन निर्देशन दिएको थियो। तर मेडिकल कलेजहरूले निर्देशन पालना नगरेपछि चिकित्सकहरू थप आन्दोलनमा उत्रिएका हुन्।
सरकार र चिकित्सकबीचको वार्ता अहिले निर्णायक मोडमा पुगेको छ। परिणामले देशभरको स्वास्थ्य सेवा प्रणालीमा प्रत्यक्ष असर गर्ने देखिएको छ।
