काठमाडौं । काठमाडौं महानगर प्रहरी फेरि आलोचनाको घेरामा परेको छ। बालुवाटारमा कवाड संकलन गरिरहेका एक मजदुरसँग अमर्यादित व्यवहार गर्दै साइकल खोसेपछि नगर प्रहरीको शैलीमाथि पुनः प्रश्न उठेको छ।
स्थानीय बासिन्दाले बिहान हल्ला गरेको गुनासो गर्दै उजुरी गरेपछि मंगलबार नगर प्रहरीले टोली खटाएको थियो। तर समस्या समाधान गर्न खटिएको टोलीको व्यवहारले उल्टै विवाद निम्त्यायो।
नगर प्रहरी प्रमुख राजुनाथ पाण्डेका अनुसार, “इन्सपेक्टर शम्भु विष्टको टोलीले मजदुरसँग राम्रो व्यवहार गर्न सकेन। साइकल खोसिए पनि तुरुन्तै फिर्ता दिइयो र दोषी इन्सपेक्टरलाई कारबाही गरेर फील्डबाट हटाइएको छ।”
नगर प्रहरीको यो विवाद नयाँ होइन। फुटपाथ व्यापारीहरू, ठेलागाडा धनी, सडकमा माग्नेहरू र अब कवाड संकलकहरूसँग गरिएको व्यवहारले बारम्बार सामाजिक असन्तुष्टि जन्माएको छ।
सामाजिक अभियन्ता र नेताहरूले महानगर प्रहरीको अमानवीय शैली सुधार गर्न दबाब दिँदै आएका छन्। तर कार्यशैली परिवर्तन नहुनु भने चिन्ताको विषय बन्दै गएको छ।
