काठमाडौं । ललितपुरको महालक्ष्मी नगरपालिका–४, इमाडोलस्थित कर्मनाशा खोलाको बगर किर्ते गरी आफ्नो नाममा लिएर बेचबिखन गरेको आरोपमा प्रहरीले ८ जनालाई पक्राउ गरेको छ।
प्रहरीका अनुसार, भूमाफियाहरूले नापी र मालपोत कार्यालयमा ‘सेटिङ’ मिलाई ५ आना जग्गालाई १ रोपनी १५ आना बनाएर बेचेका थिए। पक्राउ परेकाहरूमा सुजिता खड्का, राधेश्याम श्रेष्ठ, सानुकृष्ण महर्जन, सानुबाबु डंगोल, प्रवेश डंगोल, राजु महर्जन र सनम महर्जन रहेका छन्।
अनुसन्धानका क्रममा २०६८ सालमा सुजिता खड्काको नाममा गएकाे ५ आना जग्गामा किर्ते गरी क्षेत्रफल बढाइएको खुलेको छ। पछि उक्त जग्गा राधेश्याम श्रेष्ठको नाममा १ रोपनी १२ आना २ पैसा पास गरिएको पाइएको छ। ललितपुर प्रहरीले उनीहरूलाई १० दिनअघि पक्राउ गरी किर्ते सम्बन्धी कसुरमा अनुसन्धान गरिरहेको जनाएको छ।
