काठमाडौं । सरकारले अबको एक वर्षभित्र ५७ प्रतिशत नागरिकलाई स्वच्छ खानेपानी पुर्याउने लक्ष्य राखेको छ। खानेपानी मन्त्री प्रदीप यादवले राष्ट्रिय सभाको प्रश्नोत्तर कार्यक्रममा यसबारे जानकारी गराएका हुन्।
सांसद भुवनबहादुर सुनारले हाल १९ प्रतिशत मात्र नागरिकले गुणस्तरीय खानेपानी पाएको उल्लेख गर्दै सुधारका लागि सरकारको योजना सोधेका थिए।
खानेपानी आपूर्तिको वर्तमान अवस्था
मन्त्री यादवका अनुसार हाल २७ प्रतिशत नागरिकलाई स्वच्छ खानेपानीको पहुँच पुगेको छ। तथ्यांक अद्यावधिक हुन बाँकी रहे पनि सरकारले तेज गतिमा योजना कार्यान्वयन गरिरहेको बताइएको छ । सरकारको लक्ष्य एक वर्षभित्र ५७ प्रतिशत जनसंख्या सम्म स्वच्छ खानेपानी पुर्याउनु हो।
मन्त्री यादवले यो लक्ष्य चुनौतीपूर्ण भए पनि सम्भव हुने बताए। सरकारले यसलाई कार्यान्वयन गर्न विभिन्न योजना अघि बढाइसकेको छ।
