महोत्तरी । १५ दिने मिथिला माध्यमिकी परिक्रमा आज अन्तरगृह परिक्रमा गरेर सकिँदै छ । धनुषाको मिथिला विहारी नगरपालिका–८ कौचुरीस्थित मिथिला विहारी मन्दिरबाट शुरु भएको मिथिला माध्यमिकी परिक्रमा आज जनकपुरधाममा अन्तरगृह परिक्रमा गरेर सकिन लागेको हो ।
यसलाई पञ्चकोशी परिक्रमा पनि भन्ने गरिन्छ । परिक्रमामा सहभागीहरू आज गरिब विपन्नलाई दान गर्ने चलन छ । दान लिनका जनकपुरधामको सडकमा जताततै गरिब विपन्नहरू कपडा ओछ्याएर बसेका छन् । उनीहरूलाई परिक्रमामा सहभागीहरू चामल र नगद दान गरिरहेका छन् ।
फागुन प्रतिपदामा धनुषाको कचुरीबाट शुरू भएको मिथिला माध्यमिकी परिक्रमामा सहभागीहरू आज जनकपुरधामको अन्तरगृह परिक्रमा गरी सम्पन्न हुन्छ । प्राचीन मिथिलाको राजधानी जनकपुरधामलाई केन्द्रबिन्दु मानी यसको चारैतिरका क्षेत्रसँग जोडिएका गाउँ, नगरमा स्थितका तीर्थस्थलको भ्रमण गरिने परिक्रमालाई मिथिला मध्यमा परिक्रमा भनिन्छ ।
मिथिला महात्म्यका अनुसार मिथिलापुरीको यात्राफल राम्रो मानिन्छ । मिथिला क्षेत्रमा भाग्यले जन्म हुन्छ, यस क्षेत्रको यात्रा गर्नाले अनन्त फल प्राप्त हुनुका साथै मुण्डन, एकाध साँझ उपवास र बास बसेमा लाभ हुने विश्वास पनि मिथिला महात्म्यमा उल्लेख छ ।
यज्ञ, मन्दिर, नदी तथा व्यक्ति आदिको परिक्रमा पुण्यदायी हुने गरेको आस्था अनुरूप मिथिला परिक्रमा अन्तर्गत १ सय ३० किलोमिटरका क्षेत्रमा पदयात्रा गरिन्छ । यो परिक्रमा मेलामा सामेल भएमा पापबाट मुक्ति पाउने, रोगव्याधी निको हुने तथा जीवनको अन्त्यमा स्वर्ग प्राप्त हुने जनविश्वास छ । अन्र्तगृह परिक्रमापछि जनकपुरमा होली भने शनिबार मात्रै मनाइन्छ ।
