ढाका । बंगलादेशको एक अदालतले मंगलबार पूर्वप्रधानमन्त्री शेख हसिनाको परिवारको केही सम्पत्ति जफत गर्ने आदेश दिएको छ। साथै, अदालतले शेख हसिनाका पति स्वर्गीय आणविक वैज्ञानिक एमए वाजेद मियाको नाममा रहेको सुदासाधन सम्पत्ति जफत गर्न निर्देशन दिएको छ।
अदालतले शेख हसिनाको परिवारका १२४ वटा बैंक खाता रोक्का गर्न आदेश दिएको छ, जसमा करिब ६ अर्ब बंगलादेशी टाका रहेको बताइएको छ। यो आदेश भ्रष्टाचार निवारण आयोग (एसीसी) को याचिकाका आधारमा जारी गरिएको हो।
परिवारका सम्पत्ति रोक्का
यस आदेशअनुसार शेख हसिनाका छोरा सजिब वाजेद जोय, छोरी साइमा वाजेद पुतुल, बहिनी शेख रेहाना, तथा उनका छोरीहरू ट्युलिप सिद्दीकी र रदवान मुजीबुर सिद्दीकी को सम्पत्ति पनि जफत गरिएको छ।
भारतसँग बंगलादेशको कडा विरोध
फेब्रुअरी ६ मा बंगलादेशको विदेश मन्त्रालयले सामाजिक सञ्जाल र अन्य माध्यमहरूमा शेख हसिनाले निरन्तर दिइरहेका कथित झूटा अभिव्यक्तिहरूको कडा विरोध जनाएको थियो।
बंगलादेश सरकारले हसिनाको अभिव्यक्तिले जनताको भावनामा चोट पुर्याएको र देशमा अस्थिरता फैलाउने प्रयास भइरहेको आरोप लगाएको छ। ढाकास्थित भारतका कार्यवाहक उच्चायुक्तलाई पठाइएको विरोधपत्रमा भारतमा रहँदा हसिनालाई सामाजिक सञ्जाल र सञ्चारमाध्यमहरूमा उत्तेजक अभिव्यक्ति दिनबाट रोक्न उचित कारबाही गर्न अनुरोध गरिएको थियो।
