काठमाडौं । अमेरिकाविरुद्ध टी-ट्वेन्टी शृंखलाको तेस्रो तथा अन्तिम खेलमा आसिफ शेखले अर्धसतक पुरा गरेका छन् । अमेरिकाले दिएको १ सय ५७ रनको चुनौती पछ्याउने क्रममा शेखले ३८ बल ५० रन पुरा गरेका हुन् ।
अमेरिकाको डालसस्थित ग्रान्ड प्रेरी स्टेडियममा जारी खेलमा यो समाचार थयार पार्दासम्म नेपालले १० ओभरको समाप्तीमा १ विकेट गुमाएर ८३ रन जोडेको छ । अमेरिकाले टस जितेर ब्याटिङ रोजेको थियो ।
अमेरिकाले निर्धारित २० ओभरमा ५ विकेटको नोक्सानीमा १ सय ५६ रन जोडेको हो । नेपालका लागि सोमपाल कामीले ३ विकेट लिए भने रिजन ढकाल र ललित राजवंशीले समान १-१ विकेट लिए । एक खेलअगावै शृंखला जितेको नेपालको लक्ष्य क्लिन स्विप गर्ने रहेको छ ।
आईसीसी विश्वकप लिग टू अघिको सिरिजबाट नेपाली टोलीले लयमा फर्किएको सन्देश दिएको छ। सिरिजको पहिलो खेल १६ रनले जितेको नेपालले आइतबार विहान भएको दोस्रो खेल सुपर ओभरमा जितेको थियो।
