काठमाडौँ । साउदी प्रो लिग अन्तर्गत अल हिलालले आफ्नो अपराजित यात्रा कायम राखेको छ ।
गएराती सम्पन्न खेलमा अल हिलालले दमाकलाई २-१ गोल अन्तरले पराजित गर्दै लिगमा आफ्नो अपराजित यात्रा कायम राखेको हो ।
अल हिलालको जितमा माइकलले खेलको ९३औं मिनेटमा निर्णायक गोल गरेका थिए । यसअघि अल हिलालका लागि सलेम अलडावसरीले शुरुवाती गोल गरेका थिए । त्यस्तै दमाकका लागि डोमागोज एन्टोलिकले एक गोल गरेका थिए । यस खेलमा दमाकका धारी अल अनाजीले खेलको ८८औ मिनेटमा रातो कार्ड पाएका थिए ।
यो जितपछि अल हिलालको साउदी लिगमा २४ खेलमा ६८ अंक भएको छ र लिगमा शिर्ष स्थानमा कायम रहेको छ । अल हिलाल दोस्रो स्थानमा रहेको अल नासरभन्दा स्पष्ट १२ अंकले अगाडी रहेको छ ।
त्यसैगरी दमाकको भने २४ खेलमा ३४ अंक रहेको छ र लिगमा सातौं स्थानमा रहेको छ ।
