काठमाडौं । उपराष्ट्रपति रामसहायप्रसाद यादवलाई डेंगु संक्रमण भएपछि अस्पताल भर्ना भएका छन् । उनी बिहीबार सिभिल अस्पताल भर्ना भएका हुन् ।
यादवको सिभिल अस्पतालमा उपचार भइरहेको उपराष्ट्रपतिको सचिवालयले जनाएको छ ।राष्ट्रपति रामचन्द्र पौडेलले यादवको स्वास्थ्यलाभको कामना गरेका छन्।
राष्ट्रपतिको सचिवालयका अनुसार पौडेलले टेलिफोन गरी उपराष्ट्रपति यादवलाई स्वास्थ्यलाभको कामना गरेका हुन् । यादव केही समयअघि मात्र चीनको भ्रमण पूरा गरी स्वदेश फर्केका थिए ।
त्यसलगत्तै उनी तराई भ्रमणमा गएका थिए । स्वास्थ्य मन्त्रालयका अनुसार केही दिनयता काठमाडौंमा डेंगु संक्रमण बढ्दै गएको छ ।
