नयाँदिल्ली । हरियाणाको फतेहाबाद जिल्लाको गोरखपुर गाउँमा उत्तर भारतको पहिलो आणविक उर्जा केन्द्र स्थापना गरिने भएको छ । यो क्षेत्र दिल्लीबाट करिब १५० किलोमिटर टाढा छ ।
केन्द्रीय विज्ञान तथा प्रविधि राज्यमन्त्री जितेन्द्र सिंहले शनिबार यो जानकारी दिएका हुन् । प्लान्ट स्थापनाको काम तीव्र गतिमा भइरहेको उनले बताए । अधिकांश आणविक ऊर्जा संयन्त्र देशका दक्षिणी र पश्चिमी राज्यमा थिए। अब अन्य राज्यमा पनि प्लान्ट स्थापना गरिने भएको हो ।
यसबारे जानकारी दिँदै राज्यमन्त्री जितेन्द्र सिंहले भारतको आणविक क्षमता बढाउन विगत आठ वर्षमा धेरै क्रान्तिकारी निर्णय भएको बताए । उनले मोदी सरकारले १० वटा आणविक रिएक्टर स्थापना गर्न व्यापक स्वीकृति दिएको बताए । यसका साथै विद्युत् आयोजना निर्माणका लागि सार्वजनिक क्षेत्रका संस्थासँग संयुक्त लगानी गर्न पनि अनुमति दिइएको छ ।
उनले गोरखपुर हरियाणा परमाणु ऊर्जा परियोजनाको बारेमा जानकारी दिए। स्वदेशी डिजाइनमा बनेका प्रेसराइज्ड हेभी वाटर रिएक्टरसहित ७ सय मेगावाट क्षमताका दुई युनिट रहेको उनले बताए ।
गोरखपुर नजिकै यसको काम भइरहेको छ । यसका लागि कूल भारु २०५९४ करोड विनियोजन गरिएको थियो, जसमध्ये रु ४९०६ करोड खर्च भइसकेको र कूल वित्तीय प्रगति २३.८ प्रतिशत छ ।
