काठमाडौं । एसियाली फुटबल महासंघ (एएफसी) ले अखिल नेपाल फुटबल संघ (एन्फा) लाई ७ हजार अमेरिकी डलर (९ लाख १ हजार ६ सय ५१ रूपैयाँ) आजको विनिमयदर अनुसार जरिवाना गरेको छ ।
कुवेतमा भएको एएफसी एसियन कप २०२३ अन्तर्गत तेस्रो चरणको छनोतअन्तर्गत इन्डोनेसियाविरूद्धको खेलमा गत असार १ गते नियमविपरित काम गरेको भन्दै नेपाललाई जरिवाना तोकेको छ ।
आज एएफसीको अनुशासन समितिले जरिवाना गर्ने निर्णय सार्वजनिक गरेको छ । एएफसीले नेपाललाई दुई छुट्टा छुट्टै शीर्षकमा जरिवाना गर्नुको मुख्य कारण जरिवाना प्रमुख प्रशिक्षक अब्दुल्लाह अलमुताइरीका कारण भएको बताइएको छ ।
इन्डोनेसियाविरूद्धको तेस्रो खेलका क्रममा अलमुताइरी नेपालको ड्रेसिङ रुममा प्रवेश गरेका कारण नेपाललाई जरिवाना गराएको हो । खेलमा अलमुताइरीलाई जोर्डन र कुवेतविरुद्धको खेलमा लगातार पहेँलो कार्ड पाएपछि इन्डोनेसियाविरुद्धको खेलमा प्रतिबन्ध लगाइएको थियो । नेपालको ड्रेसिङ् रुम तथा मैदानमा समेत अलमुताइरी प्रवेश गरेका थिए ।
सो कारण एएफसीले एन्फालाई ६ हजार अमेरिकी डलर जरिवानामा पर्नु परेको छ । जसमा १५ सय डलर ९० दिनभित्र तिर्नु पर्नेछ भने ४५ सय डलर दुई वर्षका लागि रोक्का गरिने बताइएको छ ।
यसैगरि एएफसीले एन्फालाई थप एक हजार डलर जरिवाना गरेको छ। खेलको समयमा नेपाली टिम इन्डोनेसियाविरुद्धकै खेलमा पहिलो हाफमा ढिलो मैदान छिरेकोप्रवेश गरेको कारण देखाइएको छ ।
एक हजार डलरमध्ये २५० डलर ९० दिनभित्र बुझाउनु पर्ने र ७५० डलर दुई वर्षसम्म रोक्का हुने जनाइएको छ । खेलको नियमविपरित दुई वर्षभित्रमा यस्तै गल्ती गरेको अवस्थामा ७५० जफत हुने र थप जरिवाना गराइने समेत जनाइएको छ ।
७ हजार डलरको जरिवाना खेप्न परेको इन्डोनेसियाविरूद्धको खेलमा नेपाल ७–० गोलको फराकिलो अन्तरले पराजित भएको थियो।
