काठमाडौँ । पाकिस्तानमा नयाँ प्रधानमन्त्री बन्ने तयारी भैरहेका बेला इमरान खानको पार्टी पाकिस्तान तहरीक-ए-इन्साफ (पीटीआई) का सांसदहरुले राजीनामा दिने भएका छन् ।
इमरान खानले पिटीआईको संसदीय दलको बैठकमा सबै सांसदलाई राजीनामा दिन निर्देशन दिएको जियो न्यूजले उल्लेख गरेको छ । खानले निर्देशन दिएपनि कैयौं सांसदले भने प्रतिपक्षी दलहरुलाई मैदान खाली गरेर छोड्न नहुने बताएको उल्लेख गरिएको छ ।
इमरान खानले यो संसदमा भाग नलिने भन्दै आज हुने प्रधानमन्त्रीको निर्वाचन पनि बहिष्कार गर्ने बताएका छन् ।
पूर्वप्रधानमन्त्री इमरान खानले संसदीय दलको बैठकमा भनेका छन्- ‘हामी उनीहरुसँग कहिल्यै पनि सभामा बस्न सक्दैनौँ ।’
त्यस्तै पीटीआई नेता तथा पूर्व सूचनामन्त्री फवाद चौधरीले राजीनामा दिने र स्वतन्त्रताका लागि लड्ने बताएका छन् ।
यसै बीच केहि पिटीआई सांसदहरुले राजीनामा दिएको पत्र सामाजिक संजालमा सार्बजनिक गरेका छन् ।
इमरान नेतृत्वको पिटीआई पार्टीका नेशनल एसेम्बलीमा १५५ सांसद रहेका छन् ।
