काठमाडौँ । युक्रेनी राष्ट्रपति भोलोडिमिर जेलेन्स्कीले रुसविरुद्धको लडाइमा अहिलेसम्म १३ सय युक्रेनी सेनाको मृत्यु भएको जानकारी दिएका छन् ।
पत्रकार सम्मेलन गर्दै राष्ट्रपति जेलेन्स्कीले १७ दिनको लडाईमा १३ सय युक्रेनी सैनिकले ज्यान गुमाएको बताएका हुन् ।
युक्रेनले पहिलो पटक आफ्नो तर्फबाट ज्यान गुमाएका सैनिकको आधिकारिक जानकारी सार्बजनिक गरेको हो ।
यसअघि युक्रेनले अहिलेसम्म १२ हजार भन्दा बढी रुसी सेनाको ज्यान गएको दाबि गरेको थियो । तर अमेरिकी खुफिया एजेन्सीले भने अहिलेसम्म करिब ६ हजार रुसी सेनाले ज्यान गुमाएको तथ्यांक सार्बजनिक गरेको थियो ।
राष्ट्रपति जेलेन्स्कीले पत्रकार सम्मेलनमा शुक्रबार मात्र करिब ५००-६०० रुसी सेनाले युक्रेनी सेनासमक्ष आत्मसमर्पण गरेको दाबी गरेका छन् ।
पत्रकार सम्मेलनमा उनले भने- ‘मानिसहरूको टाउको र दिमागमा कब्जा गर्न सम्भव छैन । शहर र शहरहरूको कब्जा अस्थायी हो, सधैंको लागि होइन । म त्यसमा विश्वस्त छु ।’
