चितवन । काठमाडौंपछि पहिलो पटक चितवनमा कलेजोको प्रत्यारोपण सफल रुपमा गरिएको छ ।
चितवन मेडिकल कलेजका डा. सञ्जय यादब, डा. उकानन्द सिंहलगायतका १२ जनाको टोलीले चैत ८ गते भरतपुर महानगरपालिका–१० स्थायी घर भई हाल काठमाडौं बस्दै आएकी ५४ वर्षीया धनकुमारी लामाको शल्यक्रिया गरी कलेजो प्रत्यारोपण गरिएको हो । धनकुमारी लामालाई उनकी छोरी उषा तामाङले प्रत्यारोपणको लागि कलेजो प्रदान गरेकी थिइन् ।
दुई वर्ष अगाडि अनुमति लिएर चितवन मेडिकल कलेजले लामो समय आन्तरिक तयारी र आबश्यक उपकरण तथा दक्ष जनशक्ति तयार पारेर कलेजो प्रत्यारोपण गर्न सफल भएको अस्पतालका अध्यक्ष हरिष न्यौपानेले बताए ।
योसहित नेपालमा कलेजो प्रत्यारोपण आठ जनामा भएको चिकित्सक सञ्जय यादबले बताए । कलेजो प्रत्यारोपणको लागि अब बाहिर जानु नपर्ने र बिदेशको तुलनामा नेपालमै सस्तोमा कलेजो प्रत्यारोपण हुने चिकित्सकहरु बताउँछन् ।
भारतमा कलेजो प्रत्यारोपण गरेको ५० लाख भारु पर्ने गरेकोमा अब २५ लाख नेपाली रुपैँयामा गर्न सकिने अस्पतालले जनाएको छ । कलेजो प्रत्यारोपणका लागि १२ घण्टा लागेको थियो । कलेजो प्रत्यारोपण गरिएकी धनकुमारी र कलेजो प्रदान गर्ने उषा तामाङ दुवैको अवस्था राम्रो छ ।
