काठमाडौं । एमाले पुनःस्थापना भएपछि पूर्वप्रधानमन्त्री माधवकुमार नेपालले आफ्नो पक्षको बैठक निरन्तर राखिरहेका छन् । बुधबार नयाँ बानेश्वरको अर्याल होटलमा केन्द्रीय सदस्यहरूसँग छलफल गरेका नेता नेपालले आज स्थायी कमिटी बैठक बोलाएका छन् ।
बैठकमा केन्द्रीय कमिटीबाट जुटेको सहमतिका विषयमा थप छलफल हुने बताइएको छ । सर्वोच्च अदालतले नेकपा एमाले र माओवादी केन्द्रबीच भएको एकतालाई खारेज गरेसँगै पार्टीभित्रै रहेर आन्तरिक संघर्ष गर्ने जनाउँदै नेपाल समूहले एमालेमै फर्किएको थियो ।
एमाले र माओवादी केन्द्रबीच एकता भएर बनेको नेकपामा नेपाल र प्रधानमन्त्री केपी ओली पक्ष अलग अलग भएर हिँडेका थिए । ओलीले प्रतिनिधिसभा विघटन गरेपछि स्थिति तनावपूर्ण बनेको थियो । तर, पछिल्लोपटकको सर्वोच्च अदालतको फैसलाले फेरि ओली र नेपाललाई एकै ठाउँमा ल्याइदिएको छ । अब ओलीविरुद्ध कसरी प्रभावकारी ढंगले अघि बढ्ने भन्ने विषयमा नेपालले आफू निकट नेताहरूसँग छलफल थालेका हुन् ।
