काठमाडौं । नेपाल तरुण दलले कांग्रेसले चरणवद्ध विरोध प्रदर्शनका कार्यक्रममा सक्रिय सहभागी हुन सबै जिल्ला कार्यसमितिलाई निर्देशन दिएको छ ।
तरुण दल केन्द्रीय अध्यक्ष जितजंग बस्नेतले सोमबार सबै जिल्ला समितिलाई परिपत्र गर्दै आन्दोलनलाई सशक्त बनाउन निर्देशन दिएका हुन् ।
परिपत्रमा भनिएको छ, ‘नेपाली काँग्रेस पार्टीले गर्ने विरोध प्रदर्शनका कार्यक्रमलाई अझ बढी प्रभावकारी र सशक्त बनाउनका लागि नेपाल तरुण दलको जिल्ला समितिले जिल्ला पार्टीसँग समन्वय गरी सबै तह, तप्का र निकायका तरुणहरुलाई सक्रिय रुपले सहभागी गर्न र गराउन नेपाल तरुण दल केन्द्रीय समिति यसै परिपत्र मार्फत निर्देशन गर्दछ ।’
कांग्रेसले पुस २५ गते शनिबार ३३० वटै प्रदेशसभा निर्वाचन क्षेत्रहरुमा विरोध प्रदर्शन एवं सभाको आयोजना गर्दैछ। त्यस्तै माघ ३ गते शनिबार ७५३ वटै पालिकाहरुमा विरोध प्रदर्शन गर्दैछ भने माघ ८ गते बिहीबार ७५३ पालिकाहरुका ६ हजार ७४३ वडाहरुमा विरोध प्रदर्शन गर्ने कार्यक्रम तय गरेको छ।
