ढाका। शरणार्थी जीवन विताइरहेका रोहिङग्याहरुलाई आफ्नै ठाउँमा फिर्ता गराउन नसकिएको संयुक्त राष्ट्रसंघीय निकायले जनाएको छ ।
संयुक्त राष्ट्रसंघ अन्तर्गतको अधिकार प्रमुख मिचेल बाचेलेटले असुरक्षाको कारण देखाउदै उनीहरू फर्किन नमानेको जानकारी दिनुभयो ।
उनीहरुले अझै पनि आफ्नो ठाउँमा आफूहरु असुरक्षित रहेको बताउने गरेको र फर्किन नमानेको उहाँको भनाइ छ ।
रोहिङ्ग्याको बस्तीमा झण्डै पाँच वर्ष अगाडि ठूलो हिंसात्मक घटना भएपछि उनीहरु भागेर बङ्लादेशका विभिन्न ठाउँमा शरणार्थी भएर बसेका छन् ।
उनीहरुलाई आफ्नै ठाउँमा फिर्ता गराउन शरणार्थी र म्यानमार सरकारबीचमा पटक पटक सम्झौता समेत भएको थियो । सम्झौताका लागि भएका वार्ताहमा राष्ट्रसंघीय अधिकारीहरुलाई समेत सहभागी गराइएको थियो ।
पटक पटक भएका वार्ता र सम्झौताले अहिलेसम्म पनि ठोस निकास दिन नसकेपछि राष्ट्रसंघले सरोकारवालाहरुलाई फेरि पनि घच्घच्याएको छ ।
बङ्लादेशको दक्षिणी क्षेत्रमा झण्डै दश लाख शरणार्थीहरु रहेको जनाइएको छ । उनीहरु अधिकांश मुस्लीम समुदायका छन् । सन् २०१७ मा उनीहरु माथी जातीय रुपमा विभेदपूर्ण तरिकाले हिंसा भएको उनीहरुको भनाइ छ ।
म्यानमारमा अहिले सैनिक सरकार भएकाले पनि उनीहरु आफ्नो ठाउँ फर्किन सुरक्षित महसुस गर्न नसकेको राष्ट्रसंघीय अधिकारीहरुले बताएका छन् ।
राष्ट्रसंघका अधिकार प्रमुख बाचेलेटले मङ्गलबार शरणार्थी शिविरमा रहेका शरणार्थीहरुलाई भेटेर कुराकानी गर्नुभएको छ ।
बङ्लादेशको राजधानी ढाकामा बुधबार पत्रकार सम्मेलनमा उहाँले भन्नुभयो, “शरणार्थीहरु आफ्नो देश फर्किन त चाहन्छन, तर फर्किने अवस्था नरहेको बताएका छन् ।”
उनीहरुलाई फर्काउन र सहमती कार्यान्वयन गराउनका लागि राष्ट्रसंघ र बङ्लादेशले समेत पटक पटक पहल गरिरहेको पनि उहाँले जानकारी दिनुभयो ।
म्यानमार सरकारलाई फेरि घच्घच्याउनु पर्ने खाँचो रहेको बताउदै उहाँले त्यसका लागि सबैले अग्रसरता लिनुपर्नेमा जोड दिनुभयो ।एएफपी
