काठमाडौं । रंगहरूको पर्व फागुपूर्णिमा (होली) सोमबार काठमाडौं उपत्यकासहित पहाडी र हिमाली क्षेत्रमा उल्लासका साथ मनाइएको छ। एकापसमा अबिर दल्ने, लोला हान्ने, शुभकामना आदानप्रदान गर्ने र सांस्कृतिक गतिविधिमार्फत सद्भाव प्रकट गर्ने परम्पराअनुसार विभिन्न स्थानमा उत्सव मनाइएको हो।
देश अहिले प्रतिनिधिसभा निर्वाचनको सरगर्मीमा रहेकाले धेरै नागरिक प्रचारप्रसार र राजनीतिक गतिविधिमा व्यस्त छन् भने केही मतदाता मतदानका लागि आफ्नो स्थायी ठेगानातर्फ फर्किएका छन्। यस कारण उपत्यकाका मुख्य सडक तथा सार्वजनिक स्थानमा विगतका वर्षको तुलनामा भीडभाड केही कम देखिएको छ।
यद्यपि काठमाडौंको ऐतिहासिक एवं पर्यटकीय क्षेत्र बसन्तपुर दरबार क्षेत्रमा भने होलीको रौनक विशेष देखिएको छ। यहाँ भेला भएका स्वदेशी युवायुवती तथा विदेशी पर्यटकहरूले रंगीन उत्सवमा सहभागी हुँदै अबिर लगाउने, पानी छ्याप्ने र सांगीतिक धुनमा नाचगान गर्ने दृश्यले क्षेत्रलाई झनै जीवन्त बनाएको छ।
उत्सवलाई सभ्य, सुरक्षित र मर्यादित बनाउन स्थानीय प्रशासनले सुरक्षा व्यवस्था कडा बनाएको छ। सम्भावित अप्रिय घटना रोक्न प्रहरी परिचालन गरिएको छ भने पर्व मनाउने क्रममा संयमता अपनाउन सबैलाई आग्रह गरिएको छ। निर्वाचनको चटारो र होलीको उमंग एकैसाथ देखिएको यस वर्षको फागुपूर्णिमा काठमाडौंमा विशेष रौनकका साथ सम्पन्न भएको छ।
