मोरक्को। अन्तर्राष्ट्रिय मुद्रा कोष (आईएमएफ) ले चीनको रियल इस्टेट उद्योगमा विश्वास पुनःस्थापित हुनु ‘महत्वपूर्ण’ भएको बताएको छ ।
विश्वको दोस्रो ठूलो अर्थतन्त्रलाई खतरामा पार्ने रियल इस्टेट सङ्कटको भारलाई मध्यनजर गर्दै आईएमएफले मङ्गलबार चीनको आर्थिक वृद्धिको पूर्वानुमानमा संशोधन गरेको थियो ।
अन्तर्राष्ट्रिय मुद्रा कोषको मौद्रिक तथा पूँजी बजार विभागका निर्देशक टोबियास एड्रियनले भन्नुभयो, “हामी विशेष गरी चीनमा वित्तीय स्थिरताको बारेमा चिन्तित छौं ।”
उहाँले भन्नुभयो, “अधिकारीहरूले स्थानीय सरकार, बैंकहरू (विशेष गरी प्रान्तीय बैंकहरू), साथै अचल सम्पत्ति बजारमा सम्पत्ति व्यवस्थापन उत्पादनहरूले वित्तीय स्थिरता कायम राख्न सङ्घर्ष गरिरहेका तर उनीहरूले यसमा सफलता प्राप्त गर्न नसकेको देखिएको छ ।”
“त्यसैले वित्तीय प्रणालीले निरन्तर काम गरिरहेको सुनिश्चित गर्नु, घरपरिवारले अर्थव्यवस्थामा सकारात्मक दृष्टिकोण राख्न जारी राख्नु विशेष गरी आर्थिक वृद्धि र वित्तीय स्थिरताका लागि धेरै महत्वपूर्ण छ,” उहाँले थप्नुभयो ।
चिनियाँ अर्थतन्त्र यस वर्ष ५.० प्रतिशतले वृद्धि हुने अनुमान गरिएको छ । सन् २०२४ मा चीनको आर्थिक वृद्धि ५.२ प्रतिशत पुग्ने यसपहिले अनुमान गरिएकोभएपनि घटेर सन् २०२४ मा ४.२ प्रतिशतमा झरेको छ ।
मौद्रिक तथा पूँजी बजार विभागका उपनिर्देशक फाबियो नतालुचीले भन्नुभयो, “रियल स्टेट क्षेत्रमा विश्वास पुनः स्थापित गर्न यो वास्तवमै महत्वपूर्ण छ ।
यसका लागि दुई प्राथमिकताहरूमा आधारित आवास परियोजनाहरू पूरा गर्न र कमजोर विकासकर्ताहरूको पुनर्संरचना हुनुपर्दछ ।”
अन्तर्राष्ट्रिय मुद्रा कोषका प्रमुख अर्थशास्त्री पियर ओलिभर गौरिनचासले रियल स्टेट क्षेत्रको अस्थिरताले वित्तीय प्रणालीलाई अस्थिर हुन नदिन बेइजिङबाट तत्काल कदम चाल्न आग्रह गर्नुभएको छ ।
धेरै अग्रणी चिनियाँ रियल स्टेट लगानीकर्ताहरू हालैका वर्षहरूमा बढ्दो वित्तीय दबाबमा आएका छन्, ऋणको खगोलीय स्तरको साथ कोरोनाभाइरस महामारी र चीनमा व्यापक आर्थिक मन्दीले पहिले नै क्षतिग्रस्त क्षेत्रमा दिवालियापनको चिन्ता बढेको छ ।
चीनको सबैभन्दा ठूलो सम्पत्ति विकासकर्तामध्येको एक कन्ट्री गार्डेनले मङ्गलबार भनेको छ, “यसले आफ्नो सबै अपतटीय भुक्तानी दायित्वहरू समयमै पूरा गर्ने आशा गरेको छैन किनकि यो भुक्तानी गर्न असफलतातर्फ उन्मुख छ ।” कन्ट्री गार्डेनले सन् २०२२ को अन्त्यसम्ममा १.४३ ट्रिलियन युआन (१९६ अर्ब अमेरिकी डलर) ऋण उठाएको थियो ।
यसको प्रतिद्वन्द्वी एभरग्रान्डेको ऋण तीन खर्ब डलरभन्दा बढी छ र २०२१ मा भुक्तानी गर्न असफल भएको छ ।
